Nshiye akabogi mu iyogi rya Ruguru

Ndamukije abo mu rukiryi rwa Musinga

Uwimitse Jambo akarenza Jali Tamuzi

Yimwe ingoro ahabwa ikoro,agubwa nabi

Mbe gahinda watuwe ab' i Bwami kubwe!

 

Rutuku rw'ikanzu yashakaga Kalinga

Kwerera Imandwa nzungu mu Gikari

Guha Rwera ikaze mu Gikari

Byateje ubwega kwa Rutuku

Ngo amayogi 1000 azahabwa umubyeyi?

 

Nibutse akagezi n'inkiko hirya

Kugushwa ishyanga ngo ntamuze kwa Rwera

Ab'ishyanga na Jomba muraho?

Umugogo we ntiwazanywe i Shiiro

Mbe ga naho yahasize imbuto?

 

Umuco warafashe kuri bose

Intero ni Amena aho gucuragura ngo baracurira

Bene Data nimukomere muhame ku gishyitsi

Rutuku rutoza imbere y'urwabya yongeye kwama

 

Gusa ntimukabe abapfu nka Nabali

Ndebye i Tarushishi mbona amagare

Ndungurutse i Yeriko mbona igihinda

Gusa mufatire iry'iburyo ab'i Yerusalemu

Rutuku nibo yazaniye igunira Rushitsi

 

Nabaze iminsi nsanga isigaye niyo mike

Nyir'ubwami ateze idahagarara

Ejo nukebuka iy'ibicu uzabona urweera

Uramenye ntupfukiranwe n'ibikoro

 

Sinkinywa amata nabaye nyaretse

Numvise ko iz'iyo zigikamwa cyane

Ibyansi mu bitereke ahera mufate umuzingo

Sinzi ngo ikondera ni ryari

Ariko Umutaamo wa Roza ndawumva

 

Yewe ga Petero mwana wa Dawe

Ngo babyara bawe bayobotse Rwera?

Hanyuma iby'imihumetso nabumvanye nibyo?

Ariko se barakibuka Jambo?

Ndumva barataye inzira ya Sekuru Musinga

 

Aha data ngo Ahabu yabonye intebe

Gusa igikangekazi wa mugore ngo aramubiza

Ese ko numva iby'iwabo nabyo bidashinga

Nshanye rya tabaaza navanye i Pisiga.

 

Hari ako nenda ngo umare amatsiko

Ngo mwakiye imvange ifu inogerejwe?

Ariko se badi, ninde musyi ubaho ku isi

Uhangara guseera abo kwa Mukuru uwo ku buntu?

 

Ngo Nyirindekwe yazanye urweso rw'ibyaka

Gusa nabonye Mowabu yarakushutse

Ndagapfusha Inziza y'iriza nagabiwe na Mpundu

Umubonye nawe yashooka ay'abagabo

 

Hari amakuru mba nguhaye yo kwa Rwubika

Gusa hari umuzingo ngicishamo amaso

Nintora ka mitende nkize uyu mugongo

Uzabona mpingukije urwandiko ku Murambo

 

Maze numbonera Marita uzamubwire agire ubwenge

Nabonye asigaye asharuye umwera nk'imitutu

Ninsubira nzakubwira na Nyina wa Rukara

Ubu ingoro y'iwacu yabaye Umusaka ntigikuburwa.

 

Ngaho rero reba imizingo uyishyire hafi

Rwema naza uzatsembe uti nge nduwa Jambo

Kandi ntayakomera kuruta Kalinga mu isi

Uti nahisemo utari Tamuzi niko niswe

 

Nari wamusaza wakumenyeye mu nzandiko

Wawundi uvuga ategwa kenshi ay'iwacu

Ntunzi se muryo Bampamagara?

Amatage tuyivunnye tuzasubire Bucura Bwange!

 

LE 26.1.2025